Алтынсарин ауданына қарасты орманда орналасқан генерал Бакиров атындағы балалар сауықтыру лагерінде “Көңілді старт” атты спорттық сайыстар өтті, — деп хабарлайды Polisia.kz.
Шараға ата-анасының қамқорлығынсыз қалған 150 бала қатысты. Олар жазғы демалысын осы лагерьде өткізуде. Іс-шараны Қостанай облыстық ПД есірткі қылмысына қарсы іс-қимыл басқармасы және “Қостанайдың жас көшбасшылары” қоғамдық бірлестігі бірлесіп ұйымдастырды.
Басты мақсат — жасөспірімдер арасында салауатты өмір салтын насихаттау және нашақорлықтың алдын алу. Іс-шараның басында балалар мен ұйымдастырушылар “Біз – салауатты өмір салтын қолдаймыз!” деген ұранмен бас қосты.
Лагерьдегі әр күн қызыққа толы: бір күні өнер сайысы өтсе, келесі күні спорттық жарыстар мен зияткерлік ойындар ұйымдастырылады. Мұнда балалармен бірге тәрбиешілер, тәлімгерлер мен жасөспірімдер ісі жөніндегі полиция қызметкерлері жұмыс істейді.
“Көңілді старттар” сайысына спортты серік еткен көптеген бала қатысты. Қатысушыларға доптар, секіртпелер, шеңберлер және басқа да спорттық құралдармен түрлі кезеңдерден өту ұсынылды. Балалардың жылдамдығы, ептілігі және командалық рухы қазылар алқасының әділ бағасына ие болды.
— Балалардың денсаулығы — ұлт болашағының кепілі. Ертең еліміздің ғылымы, экономикасы мен кәсіпкерлігінің дамуы дәл осы жас буынға байланысты, — деді ұйымдастырушылардың бірі Айгүл Ерадилова.
Жарыс басталар алдында ол балалармен нашақорлықтың зияны және дене белсенділігінің маңыздылығы туралы профилактикалық әңгіме өткізді. Оның айтуынша, мұндай іс-шаралар облыстағы барлық жазғы лагерьлерде өткізіліп, балалар арасында оң әсерін беруде.
150 тәрбиеленуші мен тәлімгерлердің барлығы дерлік іс-шараға тартылды — біреулері белсенді қатысушы, енді біреулері жанкүйер болды. Лагерьде жарыс рухы мен көтеріңкі көңіл күй ерекше сезілді.
Мерекелік сайыстың соңында балаларға грамоталар,медальдар және тәтті сыйлықтар табысталды. Бұл марапаттар олардың белсенділігі мен күш-жігерінің лайықты бағасы болды.
