Атырауда Конституция күні қарсаңында жас полицейлер ант қабылдады, - деп хабарлайды Polisia.kz.
Ант қабылдау – елге адал қызмет етудің, халық алдындағы борыш пен жауапкершілікті сезінудің айқын белгісі. Бұл – Отанға берілген серт. Осыған орай, 30 тамыз – Қазақстан Республикасының Конституциясы күні қарсаңында Атырау облысы полиция департаментінде жас қызметкерлердің салтанатты ант қабылдау рәсімі өтті.
Шараға департамент басшылығы, ішкі істер органдарының ардагерлері және қызметкерлер қатысты. Салтанат аясында учаскелік инспекторлар қызметі күніне байланысты қызметтік міндетін адал атқарып, жақсы нәтиже көрсеткен бірқатар учаскелік полицейлер Атырау облысы ПД бастығы Нұрхат Оразбаевтың алғыс хатымен марапатталды.
Сөз алған Атырау облысы ПД бастығының орынбасары Руслан Ешманов жас әріптестеріне ізгі тілегін жеткізді:
– Жас қызметкерлерді кәсіби жолындағы алғашқы маңызды қадамдарымен құттықтаймын. Сондай-ақ қызметтік міндетін адал атқарып жүрген учаскелік полиция қызметкерлерін де мерекелерімен құттықтаймын. Сіздердің елге адал қызмет етіп, азаматтық борыштарыңызды абыроймен орындайтыныңызға сенімім мол, – деді ол.
