Астана қаласы полиция департаментінде ерекше қызметкер еңбек етеді. Рүстем Қуаныш – Қазақстан Республикасының Ата заңымен құрдас, 1995 жылы дүниеге келген жылдам қимылдайтын арнайы жасақтың жас офицері. Бүгінде ол елорда полиция қатарында абыройлы қызмет атқарып, Отан алдындағы антқа адалдығын күнделікті еңбегімен дәлелдеп жүр, - дейді Polisia.kz.
Қызметке кіріскен күнінен бастап Рүстем қоғамдық тәртіпті сақтау, азаматтардың қауіпсіздігін қамтамасыз ету және құқық бұзушылықтардың алдын алу бағытында белсенді жұмыс істеп келеді.
– Мен үшін еліміздің Ата заңы – Конституциямен бір жылда дүниеге келу – үлкен мақтаныш. Конституция – тәуелсіз Қазақстанның іргетасы, ал біз, полиция қызметкерлері, осы заңдылықты сақтаудың алдыңғы шебінде тұрған азаматтармыз. Азаматтардың құқықтары мен бостандықтарын қорғау – басты міндетіміз, – дейді жас тәртіп сақшысы.
Қызметте табандылығымен көзге түскен Рүстем бос уақытында шығармашылықпен айналысады. Ол мобилографияны сүйіп, бейнероликтер түсіріп, түрлі монтаж жасауды ұнатады. Оның айтуынша, бұл хобби кәсіби қызметте де үлкен пайдасын тигізеді.
Сонымен қатар Рүстем Өмірбекұлы спортта да жетістіктерге жеткен. Ол таэквондо спортынан "қара белбеу" иегері және "спорт шеберіне үміткер" атағын алған. Сегіз жыл бойы бапкерлікпен айналысқан тәжірибесі оның тәртіп пен табандылыққа деген көзқарасын қалыптастырған.
Әріптестері Рүстемді жауапкершілігі жоғары, кәсіби шеберлігі мен жан-жақтылығымен ерекшеленетін маман деп бағалайды. Ал тұрғындар арасында ол адалдығы мен қарапайым мінезінің арқасында сенімге ие болған.
Конституция күні қарсаңында елордалық полиция департаменті Рүстем Қуанышты жаңа буын полицейлердің символы деп санайды. Өйткені ол – тәуелсіздікпен бірге қалыптасқан жас ұрпақтың жарқын өкілі, заңға құрметпен қарайтын, мемлекетке адал қызмет ететін шынайы азамат.
