Маңғыстауда тоғыз айда 700-ге жуық мас жүргізуші анықталды, – деп хабарлайды Polisia.kz.
Жыл басынан бері облыс бойынша республикалық және жергілікті маңызы бар автожолдарда қоғамдық қауіпсіздік пен жол қозғалысын қадағалау барысында тәртіп сақшылары жол қозғалысы ережелерін бұзудың 80 591 дерегін анықтады.
Оның ішінде 671 жүргізуші мас күйінде көлік жүргізгені үшін, 6637 жүргізуші құжатсыз көлік жүргізгені үшін жауапқа тартылды. Сондай-ақ 7839 жаяу жүргіншіге белгісіз жерде жолды кесіп өткені үшін айыппұл салынды.
5676 жүргізуші техникалық регламенттердің, ұлттық стандарттардың талаптарына сай келмейтiн, сондай-ақ көлік құралдарын пайдалануға тыйым салынатын ақаулары мен жағдайлары бар көлiк құралдарын басқарды. Оларға ҚР ӘҚБтК-нің 590-бабының 5-бөлігі бойынша хаттама жасақталды, 1908 жүргізуші техникалық байқаудан өтпегені үшін осы баптың 9-бөлігімен жауапкершілікке тартылды.
