Мақтааралда учаскелік полицей тұрғынның жоғалған сиырларын тауып берді, – деп хабарлайды Polisia.kz.
Мақтаарал АПБ-ның учаскелік полиция инспекторы Нұрдаулет Айтжанов тұрғынның жоғалған сиырларын тауып берді.
Нақтырақ айтсақ, аудандық полиция бөліміне жергілікті тұрғын шағымданып, өріске жіберген алты сиырының белгісіз жағдайда жоғалып кеткенін жеткізген. Біреу ұрлап кетті ме, әлде жоғалды ма білмей, өздігінен 10 күн бойы ауыл-аймақты, жақын жерлерді іздейді. Алайда іздеуі сәтсіз аяқталады. Содан учаскелік полиция инспекторына хабарласып, мән-жайды айтып, көмек беруін сұрайды.
Хабар алысымен полиция қызметкері Нұрдаулет Айтжанов іске кірісіп, барлық қажетті іс-шараларды жүргізді. Жол толғамайтын Нива қызметтік көлікпен өзіне бекітілген, ой-шұқырын жақсы білетін аумақты мұқият қарап іздейді. Осындай жүйелі іздестірудің арқасында кешкі уақытқа дейін сиырларды тауып, заңды иесіне қайтарып берді.
Белгілі болғандай, ірі-қара малдар ауылдан 15 шақырым қашықтықтағы көрші ауылдан табылған. Ауыл тұрғыны полицейлерге шынайы алғысын жаудырды.
– Мен – Үміт. Әкемнің алты бас сиыры жоғалды. Іздедік, еш таба алмадық. Ал полицей Нұрдаулет өзінің кәсіби шеберлігін көрсетіп, міне бір тәулікке жеткізбей малдарымды тауып берді. Ризамын, жұмыстары алға бассын. Полицейлердің жұмысына табыс тілеймін, – деп атап өтті ол.
