Шығыс Қазақстан облысы полиция департаментінің тарихи музейінде “Менің тәлімгерлерім — менің мақтанышым” атты ұрпақтар кездесуі өтті, — деп хабарлайды Polisia.kz.
Іс-шараның негізгі мақсаты — аға буын арасындағы сабақтастықты нығайту, тәлімгерлік институтын дамыту және заң мен отанға өмірін арнаған ардагерлерге құрмет көрсету.
Салтанатты шараға ШҚО ПД бастығының орынбасары Серік Манапов, Ұлы Отан соғысының құрметті ардагері Құрмат Рахимұлы, ІІО және Ұлттық ұлан ардагерлер кеңесінің төрағасы Нұрлыбек Үдербаев, Тәлімгерлер кеңесінің мүшелері және қызмет жолын енді ғана бастаған жас тәртіп сақшылары қатысты.
Іс-шараның атмосферасы түрлі буын өкілдерін біріктіріп, олар таңдаған мамандыққа деген мақтаныш, құрмет пен ризашылық сезімін ұялатты.
Кеш барысында ерекше назар 100 жасқа толған ҰОС және ішкі істер органдарының ардагері — Құрмат Рахимұлында болды. Оның өмір жолы — майдандағы ерлігімен қатар, ішкі істер органдары саласындағы адал қызметі мен Отанға деген риясыз берілгендіктің айқын үлгісі. Ардагерге департамент басшылығы атынан алғыс хат пен естелік сыйлықтар табысталды.
Құттықтау сөзінде ШҚО ПД бастығының орынбасары Серік Манапов дәстүр мен тәлімгерліктің кәсіби маман қалыптастырудағы маңызын атап өтті
— Заң мен тәртіп қағидаты — бұл жай ғана ұран емес, біздің қызметіміздің мәні. Жас қызметкерлер бұл құндылықтарды тек біліп қана қоймай, күнделікті өмірінде ұстануы тиіс. Ал сіздер, құрметті ардагерлер мен тәлімгерлер — біз үшін бағдар берер темірқазықсыздар, — деді ол.
Кездесудің шарықтау шегі — жаңадан қабылданған жас мамандарға алғашқы қызметтік куәліктердің салтанатты түрде табысталуы болды. Құжатпен бірге жас қызметкерлерге адалдық, әділдік және ішкі істер қызметкері атағын абыроймен алып жүру жөнінде жүрекжарды тілектер айтылды.
Ең маңыздысы: дәстүр — бұл тек өткеннің ізі емес, келешекке негіз болатын берік іргетас. Міне, осы құндылықтар негізінде абыройлы да берік қызмет қалыптасады.
