Астаналық полицей ел чемпионатында жеңімпаз атанды, – деп хабарлайды Polisia.kz.
Астана қаласы ПД ұйымдасқан қылмысқа қарсы күрес басқармасының қызметкері Асия Ибраева Павлодар қаласында "Динамо" дене шынықтыру-спорт қоғамының 100 жылдығына орай өткен ҚР ІІМ-нің қызметтік қарудан оқ ату бойынша чемпионатында әйелдер арасында 1-орынға ие болды.
Бұл Асия Ибраева үшін республикалық деңгейдегі алғашқы жарыс еді және ол бірден сенімді жеңіске жетті. Бұған дейін ол департамент деңгейінде жақсы нәтижелер көрсетіп келген, ал бұл жолы елордалық гарнизон атынан республикалық деңгейде сәтті өнер көрсетті.
25 метр қашықтықтан дәлдікке ату жаттығуында ол 173 ұпай жинап, арнайы бөлімшелердің қызметкерлерін қоса алғанда, ел бойынша үздік нәтижеге қол жеткізді. Батыр полицейдің артында 26 жылдық жедел қызмет тәжірибесі бар.
ҚР ІІМ Қостанай заң институтының түлегі, ол мергендік қабілетін сол кездің өзінде-ақ таныта білген. Айтуынша, оның басты артықшылығы — төзімділік пен шешуші сәтте сабыр сақтай білу. Әсіресе, нәтижеге қарудың шүріппесін тегіс басу әсер ететін сәтте. Дәл осы қасиеттер оған жылдамдыққа атуда мінсіз нәтиже көрсетуге көмектесті.
Жарысқа дейін ол Астана қалалық полиция департаментінің базасында небәрі бір апта қарқынды дайындық жүргізген. Дегенмен, оның үнемі жүргізетін атыс жаттығулары өз нәтижесін берді: ол әр жаттығуда бар күшін салатын. Басшылық оның жарысқа қатысуын қолдап, сенім артты — бұл сенім ақталды.
Асия Ибраеваның айтуынша, ендігі мақсаты — осы деңгейде қалып, алдағы жарыстарға қатысуды жалғастыру. Бұл спорт түрінде жас шектеуі жоқ, сондықтан ол болашақта да департаменттің намысын биік деңгейде қорғауға ниетті.
Астана қаласы полиция департаментінің бастығы Марат Төлебаев әріптесін құттықтап, оның кәсібилігі мен жанкештілігін, сондай-ақ елордалық гарнизонның республикалық жарыстардағы абыройлы көрсеткішін атап өтті. Бұл жетістік астаналық полиция қызметкерлерінің кәсіби және атыс дайындығының жоғары деңгейін тағы бір мәрте дәлелдеді. Погон таққан әйелдер тек өз міндетіне адалдығын ғана емес, сонымен қатар спорттағы сенімді жетістіктерін де көрсетуде.
