Парижде өткен Олимпиада ойындарының күміс жүлдегері Нариман Құрбанов Қазақстан Республикасы ІІМ Ұлттық ұланының “Оңтүстік” өңірлік қолбасшылығына қарасты 5571 әскери бөліміне қонаққа барды, – деп хабарлайды Polisia.kz.
Қазақстан тарихында спорттық гимнастикадан алғашқы жүлдені алып, көк Туымызды көкке көтерген Нариман Құрбанов ұландық сарбаздармен жүздесті. Кездесу барысында ол құқықтық тәртіпке жауапты жауынгерлерге өз ақыл-кеңесін айтып, Отанға адал қызмет етіп жүргендері үшін алғыс білдірді.
Шара соңында 5571 әскери бөлімі командирінің тәрбие және әлеуметтік-құқықтық жұмыстар жөніндегі орынбасары Ұлықбек Қараев та чемпионға жеңісімен елімізді әлемге мойындатқаны үшін ұландықтар атынан алғысын жеткізді.
Сондай-ақ құрметті қонақты “Оңтүстік” өңірлік қолбасшылығының қолбасшысы Талапкер Әміреевтің алғыс хатымен марапаттап, естелікке сыйлық табыстады.
