Орал қаласындағы №6 мектепте оқушыларға арналған қауіпсіздік сабағы өтті, - деп хабарлайды Polisia.kz.
Орал қаласындағы №6 орта мектепте полиция қызметкерлері оқушыларға жеке қауіпсіздік ережелерін түсіндіруге бағытталған профилактикалық сабақ өткізді.
Кездесу барысында тәртіп сақшылары балаларға интернеттегі қауіпсіздік қағидалары, алаяқтардың айла-тәсілдері және олардың құрбаны болмау жолдары туралы айтты. Сондай-ақ буллинг ұғымын түсіндіріп, мұндай жағдайларда қалай әрекет ету керектігі жөнінде кеңестер берді.
Сабақта оқушылар күнделікті өмірде кездесуі мүмкін қауіпті жағдайларды талқылап, келесі маңызды сұрақтарға жауап алды:
Қауіпті дер кезінде қалай байқауға болады?
Қиын жағдайда кімнен көмек сұрауға болады?
Қайда және қалай жүгіну керек — ата-аналарға, мұғалімдерге, сенім телефонына немесе полицияға ма?
Сонымен қатар тәртіп сақшылары жол қозғалысы ережелерін сақтау мен көшеде қауіпсіз жүріс-тұрыс жасау маңыздылығын да еске салды.
Мұндай профилактикалық іс-шаралар балалардың өз қауіпсіздігіне жауапкершілікпен қарауын қалыптастырып, түрлі өмірлік жағдайда дұрыс шешім қабылдау дағдыларын дамытуға бағытталған.
