Оралда өмір бойына жүргізуші куәлігінен айырылған тұрғын қайта көлік басқарған, – деп хабарлайды Polisia.kz.
Орал қалалық ПБ патрульдік полиция батальонының қызметкерлері қоғамдық және жол қауіпсіздігін қамтамасыз ету мақсатында тәулік бойы патрульдеу жұмыстарын жүргізуде.
Кезекті қызмет барысында көлік құралын мас күйінде басқарған үш жүргізуші анықталды. Барлығы да бұған дейін көлік құралын басқару құқығынан айырылған.
Түнгі уақытта қаланың әртүрлі аудандарында екі Volkswagen Passat және Kia Rio көлік тоқтатылды. Медициналық куәландыру қорытындысы бойынша жүргізушілердің орташа дәрежедегі алкогольдік масаң күйде болғаны анықталды.
Тексеру барысында барлық жүргізушінің бұған дейін де осындай құқық бұзушылықтар үшін әкімшілік және қылмыстық жауапкершілікке тартылып, көлік құралын басқару құқығынан ұзақ мерзімге, бір жағдайда өмір бойына айырылғаны белгілі болды. Соған қарамастан, олар заң талаптарын елемей, қайтадан рөлге отырған.
Аталған фактілер бойынша сотқа дейінгі тергеп-тексеру амалдары басталды. Көлік құралдары арнайы тұраққа қойылды.
