Шығыс Қазақстан облысының ПД қызметкерлері тұтынушыларына интимдік қызметтер ұсынумен айналысқан массаж салонын анықтады, – деп хабарлайды Polisia.kz.
ШҚО ПД криминалдық полиция қызметкерлері жедел-іздестіру іс-шараларын жүргізу барысында облыс орталығының аумағында орналасқан массаж салондарының бірінде жеңгетайлық фактісін анықтады. Аталған массаж салонында қыздар клиенттерге қосымша ақы үшін интимдік қызметтер көрсеткен, атап айтқанда «Body» массаж жасаған.
– Криминалдық полиция басқармасының жедел уәкілдері Өскемен қаласының 35 жастағы тұрғынын ұстады, ол осы массаж салонының директоры ретінде клиенттерге жағдай жасай отырып, ақшалай сыйақы үшін интимдік қызметтер көрсетуді ұйымдастырған, – деді ШҚО ПД бастығының орынбасары Талғат Шаяхметов.
Аталған факт бойынша ҚР ҚК-нің 309-бабының 1-бөлігімен (Жезөкшелiкпен айналысуға арналған притондар ұйымдастыру немесе оларды ұстау, сол сияқты пайдакүнемдiк мақсаттағы жеңгетайлық) сотқа дейінгі тергеу әрекеттері жүргізілуде.
