Павлодар колониясында биг-бэгтер тігетін жаңа өндірістік цех ашылды, - деп хабарлайды Polisia.kz.
Павлодар облысы бойынша ҚАЖД-ға қарасты №46 мекемесінде өнеркәсіптің түрлі салаларында кеңінен қолданылатын берік полипропилен қаптары — биг-бэгтерді тігетін жаңа өндірістік цех іске қосылды.
Бұл жоба сотталғандарды еңбек арқылы түзеу бағдарламасы аясында жүзеге асырылды. Жаңа цех бүгінде аталған мекемеде жазасын өтеп жатқан 100-ден астам сотталғанды жұмыспен қамтып отыр. Бұл — сотталғандарды тиімді әлеуметтендіру, кәсіби дағдыларын дамыту және қоғамға бейімдеу бағытында маңызды қадам.
Цех заманауи жабдықтармен қамтамасыз етілген, сондай-ақ ішкі нарықта сұранысқа ие сапалы өнім шығаруға мүмкіндік береді. Алдағы уақытта өндіріс ауқымын кеңейту және өнім көлемін арттыру жоспарлануда.
Аталған өндірістің ашылуы сотталғандардың бос уақытын тиімді ұйымдастыруға ғана емес, оларға еңбек нарығында сұранысқа ие дағдыларды меңгеруге мүмкіндік береді. Бұл болашақта олардың қоғамға сәтті бейімделуіне ықпал етіп, қайта қылмыс жасау мүмкіндігін төмендетеді.
