Павлодар облыстық полиция департаментінде үздік қызметкерлер марапатталды, - деп хабарлайды Polisia.kz.
Қазақстан Республикасының Конституциясының 30 жылдығы қарсаңында облыстық Полиция департаментінің үздік қызметкерлері Ішкі істер министрі Ержан Сәденовтің атынан ведомстволық марапаттарға ие болды. Марапаттар қызметтік міндеттерін адал орындап, құқықтық тәртіпті қамтамасыз етуде және қылмысқа қарсы күресте жоғары нәтиже көрсеткен тәртіп сақшыларына табысталды.
Қызметтік жетістіктері үшін:
-
Полиция майоры арнаулы атағы шекті деңгейден бір саты жоғары капитан Әлібек Мұхамеджановқа берілді;
-
Полиция капитаны атағы мерзімінен бұрын Әкімбек Әлназаровқа табысталды;
-
Ертай Күсемісов "Құқық тәртібін қамтамасыз етуге қосқан үлесі үшін" медалімен марапатталды;
-
"Ішкі істер органдарының үздігі" төсбелгісі Әділет Сапаров пен Бақытбек Байдүйсеновке табысталды;
-
ҚР ІІМ Құрмет грамотасына Сайран Душимов ие болды;
-
Алғыс хаттар Дастан Исенов пен Рустам Баштаевқа тапсырылды.
Марапаттау рәсімінде Павлодар облысы полиция департаменті бастығының орынбасары Жандос Орынбаев қызметкерлерді мерекемен құттықтап, еліміздің Негізгі заңының қоғамдағы бірлік пен келісімді, тұрақтылық пен дамуды қамтамасыз ететін басты құндылық екенін атап өтті.
– Конституция – елдің тұрақты дамуы мен берік тұғырының негізі. Баршаңызға қызметте амандық, отбасыларыңызға береке, кәсіби жолдарыңызға табыс тілеймін, – деді ол өз құттықтау сөзінде.
