Павлодар облысында полицейлер оқушыларға құқықтық дәріс өткізді, – деп хабарлайды Polisia.kz.
Павлодар облысында №39 орта жалпы білім беретін мектепте патрульдік полиция батальоны ротасының командирі Рахим Ибраевтың қатысуымен профилактикалық лекция өтті. Іс-шара оқушылардың құқықтық сауатын арттыру және қауіпсіз мінез-құлықты қалыптастыру мақсатында ұйымдастырылды.
Кездесу барысында оқушыларға жол қозғалысы ережелерінің негізгі талаптары түсіндіріліп, жаяу жүргіншілердің, велосипедшілердің және жеке мобильділік құралдарын пайдаланушылардың қауіпсіздігіне ерекше назар аударылды.
Полиция қызметкері жолдан өту кезінде, әсіресе білім беру ұйымдарының маңында, ЖҚЕ талаптарын қатаң сақтаудың маңызын еске салды.
Лекцияның жеке бөлімі буллинг пен кибербуллинг мәселелеріне арналды. Оқушыларға психологиялық қысымның түрлері, құқыққа қайшы әрекеттер үшін жауапкершілік, сондай-ақ мұндай жағдайларға тап болған кезде қайда және қалай көмекке жүгінуге болатыны түсіндірілді. Мәселені жасырын қалдыру ауыр салдарға әкелуі мүмкін екені атап өтілді.
Сондай-ақ кездесу аясында интернет-алаяқтық тақырыбы қарастырылды. Оқушыларға желідегі алдаудың кең таралған тәсілдері, жеке деректерді қорғау қағидалары, әлеуметтік желілер мен мессенджерлерді қауіпсіз пайдалану жолдары туралы ақпарат берілді.
Лекция соңында Рахим Ибраев оқушылардың сұрақтарына жауап беріп, оларды нақты өмірде де, цифрлық кеңістікте де заңға бағынатын, мұқият әрі жауапты болуға шақырды.
Жас ұрпақпен жүргізілетін профилактикалық жұмыс жалғасады.
