Павлодар облысында полицейлер жолда қиын жағдайға тап болған жүргізушілерге көмектесті, – деп хабарлайды Polisia.kz.
Естай - Катаев көшелерінің қиылысындағы әкімшілік учаскеде қызмет атқарып жүрген полиция қызметкерлері Дәурен Қамзин мен Амангелді Әділ жолдың жүру бөлігінде тұрған автокөлікті байқады. Полиция көлікті тұрақ орнына апарып, қиын жағдайға тап болған жүргізушіге жедел көмек көрсетті.
Басқа жағдайда, Павлодар - Успен автожолында қаладан Успен ауылына қарай бағыт алған Audi автокөлік жүргізушісіне көмек қажет болды. Осы жол учаскесін күзеткен Мадияр Әбдіқанов пен Елнар Кәрімов көлікті жол жиегіне қауіпсіз жерге сүйреп апарды.
- Көмек бергені үшін полиция қызметкерлеріне көп рақмет. Оларға өз міндеттерін орындап қана қоймай, қылмыскерлерді анықтап, қылмыстарды ашқаны үшін, сондай-ақ осындай қиын жағдайларда адамдарға көмектескені үшін алғыс айтамын. Жігіттерге зор денсаулық пен қызметте сәттілік тілеймін, - деп ризашылығын білдірді жүргізуші Мұрат Мұсатаев.
Полиция жүргізушілерді қауіпсіздік ережелерін сақтауға және алыс жолға шығарда көліктерінің жағдайына мән беруге шақырады. Жолдағы ақауларды болдырмау үшін көліктің техникалық күйін, соның ішінде тежегіштерді, шиналарды, аккумуляторды және жарықтандыру жүйесін тексеру маңызды. Сондай-ақ қашықтық пен жылдамдық ережелерін сақтау ұсынылады, әсіресе нашар көріну немесе тайғақ жол жағдайында. Қыс уақытында жолдағы жағдайды жақсарту бойынша жұмыс одан әрі жалғасатын болады.
"Заң және тәртіп" қағидаты ішкі істер органдарының азаматтардың қауіпсіздігін қамтамасыз етуге және қоғамдық тәртіпті сақтауға бағытталған қызметінің негізі болып қала береді.
