"Қауіпсіз аула" жедел-профилактикалық іс-шарасы аясында Павлодар облысы Успен ауданы полиция бөлімінің қызметкерлері орталық аудандық аурухана мамандарымен бірлесіп А. Байтұрсынов атындағы мектептің оқушыларымен профилактикалық кездесу өткізді, - деп хабарлайды Polisia.kz.
Кездесу барысында оқушыларға алкоголь мен есірткі заттарының қауіптілігі, олардың адам денсаулығына тигізетін зияны, сондай-ақ мұндай зиянды әдеттердің әлеуметтік және құқықтық салдары жан-жақты түсіндірілді.
Жастардың салауатты өмір салтын саналы түрде таңдауына және өз болашағы үшін жеке жауапкершілікті қалыптастыруға ерекше назар аударылды.
Сонымен қатар полицейлер оқушыларға мектепте және қоғамдық орындарда өзін ұстау ережелерін еске салып, құрдастар тарапынан болатын арандатуларға қарсы тұру және жеке қауіпсіздікті қамтамасыз ету бойынша ұсыныстар берді.
– Іс-шараның басты мақсаты – жасөспірімдердің құқықтық сауаттылығын арттыру, өз болашағына деген жауапкершілікті қалыптастыру және жастар арасындағы құқық бұзушылықтардың алдын алу. Ал профилактика – әрбір бала өзін қауіпсіз сезінетін, қолайлы мектеп ортасын қалыптастырудағы маңызды қадам. Мұндай кездесулер жасөспірімдердің хабардарлығын арттырып қана қоймай, әркім өз ойын еркін айтып, қолдау ала алатын сенім мен ашықтық атмосферасын қалыптастырады, – деп атап өтті Успен ауданы полиция бөлімінің бастығы Аскар Аралбаев.
