Павлодар облысында “Тасымалдаушы” республикалық жедел-профилактикалық іс-шарасы аясында қоғамдық көлік және жүк тасымалдау ережелерінің сақталуын қадағалау күшейтілді, – деп хабарлайды Polisia.kz.
Бірінші күннің өзінде-ақ құқық қорғау органдары 116 әкімшілік құқық бұзушылықты анықтады. Бұл құқық бұзушылықтардың ең жиі кездесетін түрлері – маневр жасау ережелерін сақтамау, жолаушылар мен жүкті тасымалдау талаптарын бұзу, белгіленген жылдамдықтан асып кету, көлік жүргізу кезінде телефонды пайдалану секілді әрекеттер болды.
Аймақтық полиция департаментінің мәліметіне сәйкес, бірнеше жүргізуші заңсыз тасымалдау әрекеттері үшін жауапкершілікке тартылды.
Мысалы Ақсу қаласында жүргізуші тіркелмеген Toyota Alphard көлігімен ұсталды, ал Екібастұзда жүргізуші Volkswagen көлігімен жолаушыларды тасымалдау ережелерін бұзғаны анықталды. Павлодар қаласында болса, Mazda көлігінің жүргізушісі Яндекс қосымшасы арқылы рұқсатсыз жолаушы тасымалдаумен айналысқан.
Қоғамдық көліктерде және қоғамдық орындарда азаматтардың қауіпсіздігін қамтамасыз ету мәселесі облыстық полиция департаментінің жіті бақылауында. Полиция өкілдері тасымалдаушыларды жол жүру ережелерін қатаң сақтап, жолаушылардың қауіпсіздігіне ерекше мән беруге шақырады.
Сонымен қатар тұрғындарға қоғамдық көліктегі қауіпсіздік тек тасымалдаушыға ғана емес, жолаушылардың да өз қауіпсіздік шараларын ұстануына байланысты екенін ескертеді.
