Павлодар облысында жыл басынан бері жолдың жүру бөлігінің қарсы бағытына шыққаны үшін 146 жүргізуші әкімшілік жауапкершілікке тартылып, 6 ай мерзімге көлік басқару құқығынан айырылды, – деп хабарлайды Polisia.kz.
Көбінесе жүргізушілер жолдың қарсы жолағына шығып, мұндай маневр жасауға тыйым салатын жолақты немесе белгіні байқамай басып озады.
Қарсы жолаққа шығу жол-көлік оқиғасын тудыруы мүмкін елеулі құқық бұзушылықтардың бірі болып табылады. Жаңа ережелерге сәйкес мұндай қасақана құқық бұзушылық жасағаны үшін жүргізуші алты ай мерзімге көлік құралын басқару құқығынан айырылады.
– Жыл басынан бері облыста ҚР Әкімшілік құқық бұзушылық туралы кодексінің 596-бабының 3-бөлігі (Жол жүрісі қағидаларында тыйым салынған жағдайларда, жолдың жүру бөлігінің қарсы бағытта жүруге арналған жағына, оның ішінде кері бұрылып немесе бұрылыс жасап шығу) бойынша 146 жүргізуші әкімшілік жауапкершілікке тартылып, 6 ай мерзімге көлік басқару құқығынан айырылды.
Бұдан басқа ҚР Әкімшілік құқық бұзушылық туралы кодексінің 601-бабы (Жол белгілерімен немесе жолдың жүру бөлігіндегі таңбалармен көрсетілген талаптарды сақтамау) бойынша 7 050 азамат әкімшілік жауапкершілікке тартылды, – деп хабарлады Павлодар облысының ПД Жергілікті полиция қызметі басқармасының бастығы Ғалым Сарғұлов.
