Қиын жағдайда қалған балаларға қолдау көрсетіп, олардың болашағына ықпал ету — үлкен жауапкершілік. Бұл міндетті күн сайын абыроймен атқарып жүрген мамандардың бірі — Железин аудандық полиция бөлімінің инспекторы Ия Илюбаевна туралы Polisia.kz сайтынан оқыңыздар.
Полиция қызметі жауапкершілігі жоғары, тәртіп пен табандылықты талап ететін сала екені белгілі. Бұл мамандықты, әдетте, ерлерге тән деп санайтындар аз емес. Дегенмен бүгінгі күні тәртіп сақшылары қатарында еңбек етіп жүрген әйелдер өз қызметіне деген адалдығымен, кәсіби біліктілігімен және талапшылдығымен бұл пікірді жоққа шығарып отыр. Олар қауіпті де күрделі жағдайларда маңызды шешім қабылдап, азаматтардың қауіпсіздігін қамтамасыз ету жолында ерлермен қатар қызмет атқарады.
Осындай мамандардың бірі — Железин ауданы полиция бөлімінің кәмелетке толмағандар ісі жөніндегі аға учаскелік инспекторы Ия Балғужинова. Оның жұмысы — ерекше назарды, байсалдылықты және психолог ретіндегі сезімталдықты талап ететін бағыттардың бірі.
Ия Илюбаевнаның айтуынша, кәмелетке толмағандармен жұмыс істеу — бір мезетте әрі күрделі, әрі жауапты міндет:
— Мен күн сайын балалармен тілдесемін. Әрқайсысына жеке көзқарас табуға тырысамын — бұл кейде оңайға соқпайды. Бірақ олардың дұрыс жолға түсуіне бағыт көрсету, қауіпті қадамнан сақтандыру, құқықтық қолдау көрсету — менің тікелей міндетім. Әрине, жауапкершіліктен жалтарған ата-аналар да назарымнан тыс қалмайды, — дейді ол.
Инспектордың негізгі жұмысы — қиын жағдайға тап болған балалар мен олардың отбасыларына қолдау көрсету. Ол қызмет көрсететін аумақтың ерекшеліктерін жан-жақты зерттеп, жұмыс жоспарын осы айырмашылықтарды ескере отырып құрады. Мектеп әкімшіліктерімен тығыз байланыс орнатып, ұстаздармен бірлескен профилактикалық шаралар жүргізеді. Балалардың мінез-құлқын зерттеп, олардың қауіпсіздігіне қауіп төндіретін жағдайларды дер кезінде анықтауға күш салады.
Ішкі істер органдарындағы қызмет жолын 2007 жылы бастаған Ия Илюбаевна өзінің қажырлы еңбегімен, кәсіби тәжірибесімен ерекшеленеді. Бүгінде ол — жас мамандарға бағыт-бағдар беріп, тәжірибесімен бөлісетін тәлімгер. Әріптестері оның жауапкершілігін, еңбекқорлығын және адамдарға деген жанашырлығын ерекше атап өтеді.
Кәмелетке толмағандар істері жөніндегі инспектордың күнделікті жұмысы көзге көрінбейтін, бірақ қоғам үшін аса маңызды бағыттардың бірі. Балалар қауіпсіздігі, олардың құқықтарын қорғау және дұрыс жолға бағыттау — Ия Илюбаевна сияқты мамандардың кәсіби шеберлігі мен жанкешті еңбегінің нәтижесі.
Олардың қажырлы еңбегі қоғамдағы тәртіп пен тұрақтылықты нығайтуға, ең бастысы — жасөспірімдердің жарқын болашағын қалыптастыруға елеулі үлес қосып келеді.
