Павлодар облысының полицейлері ауыл тұрғындарынан миналар мен қарулар тәркіледі, – деп хабарлайды Polisia.kz.
Рейдтік іс-шаралар барысында облыс полицейлері заңды тұлғаларды, мамандандырылған дүкендерді, шаруа қожалықтары мен шалғай учаскелерді тексерді.
– Нәтижесінде заңсыз айналымнан 4 бірлік қару, ПМН екі оқу минасы, граната және тегіс ұңғылы қаруға патрондар табылды және тәркіленді. Айналым ережелерін бұзғаны үшін 98 бірлік қару тәркіленді, барлық заң бұзушылар мамандандырылған оқу орталықтарына қайта даярлауға жіберілді, – дейді Павлодар облысы полиция департаментінің баспасөз қызметі.
Полиция тұрғылықты жері бойынша 2140 жеке қару иесі тексерілгенін, оларда 85 әкімшілік құқық бұзушылық анықталғанын атап өтті. Мысалы, Баянауыл ауданының тұрғынынан қойма бөлмесінің дәлізінен 16 калибрлі бір ұңғылы тегіс ұңғылы мылтық тәркіленді. Ал Май ауданының тұрғынынан ПМН-2 оқу минасы тәркіленді.
Железин ауданының ауыл тұрғынынан заңсыз сақталған металл газ тапаншасы тәркіленді. Барлық фактілер бойынша баллистикалық сараптамалар тағайындалды, олардың нәтижелері бойынша процестік шешім қабылданатын болады.
Полиция азаматтарға қару-жарақ құжаттарының болмауы қолданыстағы заңнаманы елеулі бұзу екенін еске салады. Сонымен бірге, қаруды өз еркімен тапсырған адам қылмыстық және әкімшілік жауаптылықтан босатылады. Сіз өзіңіздің тұрғылықты жеріңіздегі полиция бөліміне немесе 8 (7182) 39-11-75 телефондары арқылы қару-жарақ пен оқ-дәрілерді ерікті түрде тапсыру тәртібі туралы толық ақпарат ала аласыз.
