Павлодар облысының Солтүстік полиция бөлімінде ардагерді мерейтойымен құттықтады, - деп хабарлайды Polisia.kz.
Ішкі істер органдарында ұзақ жылдар қызмет етіп, ел тыныштығы мен қауіпсіздігі үшін аянбай еңбек еткен ардагерлер әрдайым құрметке лайық. Солтүстік полиция бөлімінде Серік Жакеновты мерейтойымен құттықтау рәсімі өтті.
Серік Амангелдіұлы ішкі істер органдарындағы еңбек жолын 1993 жылы Екібастұз қаласында патрульдік-бекеттік қызметтің милиционері болып бастаған. Кейін учаскелік милиция қызметіне тағайындалды.
– Учаскелік инспектор – бұл тек қылмыстық іздестіруші немесе криминалист қана емес, сонымен қатар халықтың сеніміне ие болатын тыңдаушы, көмекші әрі психолог. Учаскелік қызметтің негізгі міндеті – халықпен тікелей жұмыс жүргізу. Отбасы ішіндегі мәселелерді шешу, тұрмыстық жанжалдарды реттеу, қоғамдық тәртіпті бақылау, шартты түрде сотталғандарды және мерзімінен бұрын босатылғандарды қадағалау – осының бәрі учаскелік инспектордың құзыретіне кіреді, – деп еске алады ардагер.
Қызмет барысында Серік Жакенов кәсіби шеберлігімен, жоғары көрсеткіштерімен көзге түсіп, Қашыр аудандық ішкі істер бөлімінің кәмелетке толмағандардың істері жөніндегі қылмыстық іздестіру бөлімінің аға жедел уәкілі қызметіне тағайындалды.
Ұзақ жылғы адал еңбегі үшін ол Ішкі істер министрлігінің барлық дәрежелі "Мінсіз қызметі үшін" медальдарымен және Құрмет грамоталарымен марапатталды. 2012 жылы зейнетке шыққан ардагер бүгінде ІІО ардагерлер кеңесінің белсенді мүшесі ретінде қоғамдық жұмыстарға белсене қатысып, жас буынға үлгі көрсетіп келеді.
Мерейтой иесіне зор денсаулық, ұзақ ғұмыр тілеген әріптестері ардагерлерді құрметтеу дәстүрі ведомствоның мызғымас құндылығы екенін атап өтті.
– Өз өмірін қоғамға қызмет етуге арнаған жандарды құрметтеп, оларға ерекше көңіл бөлу – ІІМ-нің көпжылдық дәстүрі. Бұл сабақтастық пен ардагерлерге деген құрметтің үзілмейтінін білдіреді, – деді шара барысында ведомство өкілдері.
Серік Амангелдіұлының өмірі мен қызмет жолы – ел игілігі үшін аянбай еңбек етудің жарқын үлгісі.
