Павлодарда полицейлер волейболдан турнир өткізді, – деп хабарлайды Polisia.kz.
Павлодар қаласындағы «Динамо» спорт кешенінде полиция бөлімшелерінің арасында волейболдан дәстүрлі турнир өтті. Оған 11 команда қатысып, тартысты додаға түсті.
Мемлекет басшысының Қазақстан халқына Жолдауында денсаулықты нығайтуға баса назар аударылғаны белгілі. Бұл бастама құқық қорғау органдары қызметкерлері үшін де басты басымдықтардың бірі саналады. Павлодар облысы Полиция департаментінің Арнайы және жұмылдыру дайындығы басқармасының бастығы Ерік Төлегенов турнир қатысушыларын құттықтады.
– Салауатты өмір салтын ұстану – әр адамның күнделікті нормасына айналуы керек. Бұл тек кәсіби қызметке көмектесіп қана қоймай, денсаулық пен күш-жігерді нығайтады. Волейбол – командалық ойын, бұл жерде жеңіске жету әр мүшенің ортақ еңбегінің нәтижесі, – деп атап өтті ол.
Турнир барысында командалар жоғары дайындықтарын, өздеріне деген сенімділіктерін және жеңіске деген жігерлерін көрсетті. Ойын алаңында шиеленісті сәттер, әсерлі шабуылдар мен мызғымас қорғаныс көп болды. Мықты блоктар мен дәл соққылар жарысты көрермендер үшін ұмытылмас етті.
Шиеленісті ойын нәтижесінде Павлодар қаласы полиция басқармасының командасы турнир жеңімпазы атанды. Екінші орынды полиция департаментінің аппараты иеленсе, үшінші орын Аққулы ауданы полиция бөлімінің командасына бұйырды.
Жеке номинациялар бойынша да үздіктер марапатталды:
«Турнирдің үздік ойыншысы» – Қайрақан Айдос (Павлодар қ. ПБ).
«Үздік шабуылшы» – Иманқұлов Асылхан (ПД).
«Үздік байланыстырушы» – Баязитов Олжас (Аққулы ауданы).
Жарыстың барлық қатысушыларына кубоктар, медальдар және бағалы сыйлықтар табыс етілді.
Турнир тек спорттық жарыс емес, әріптестер арасындағы ынтымақ пен достықты нығайтудың тамаша үлгісіне айналды. Қатысушылардың айтуынша, мұндай іс-шаралар ұжымдық рухты арттырып, спортты тек жарыс емес, денсаулықты нығайтудың және ұлттық бірлікті дәріптеудің құралы ретінде көрсетеді.
Жарысты тамашалаған көрермендер мен жанкүйерлер де көтеріңкі көңіл күй мен ерекше әсер алды. Бұл турнир Павлодар полицейлерінің спортқа деген сүйіспеншілігі мен ұйымшылдығының айқын дәлелі болды.
