Павлодарда 700-ге жуық жүргізуші бағдаршамның қызыл түсіне өтіп кеткен, - деп хабарлайды Polisia.kz.
Бағдаршамның қызыл сигналына өту – бұл тек қана жүргізушінің өміріне емес, сонымен қатар басқа жүргізушілер мен жолаушылардың өміріне де қауіп төндіретін әрекет. Алайда кейбір жүргізушілер үшін рұқсат етілген сигналды күту тым ұзақ болып көрінеді. Мұндай жағдайда қызылға өтуге ұмтылатындар құқық бұзушыларға айналады.
Статистикаға сүйенсек, жыл басынан бері Павлодар облысында 693 адам бағдаршамның тыйым салынған қызыл сигналына өтіп кеткені үшін жауапкершілікке тартылған.
Мысалы Павлодар қаласында Жібек Жолы мен Малайсары батыр көшелерінің қиылысында жүргізуші Lexus көлігін жүргізіп, бағдаршамның қызыл сигналына өтіп, өзіне, жолаушыларына және басқа да жол қозғалысы қатысушыларына қауіп төндірді. Жүргізуші жауапкершілікке тартылып, 10 АЕК көлемінде айыппұл салынды.
Тәртіп сақшылары жол қозғалысындағы маңызды параметрдің бірі – жылдамдықты дұрыс таңдау екенін ескертеді. Оны дұрыс таңдай алмау жол-көлік оқиғаларына әкеліп соғуы мүмкін. Жолда жарыс ұйымдастырудың қажеті жоқ. Есіңізде болсын, қауіпсіздік "жеңістерден" әлдеқайда маңызды.
