Павлодарда есірткі саудасымен айналысқан қылмыстық топтың қызметі тоқтатылды, – деп хабарлайды Polisia.kz.
Павлодар облысы полиция департаментінің ұйымдасқан қылмысқа қарсы күрес басқармасының қызметкерлері экономикалық тергеу департаментімен және прокуратураның үйлестіруімен бірлесіп, есірткі таратумен айналысқан қылмыстық топтың жолын кесу мақсатында ауқымды операция жүргізді.
Анықталғандай, топ мүшелері ұзақ уақыт бойы Telegram мессенджері арқылы интернет-дүкен ашып, психотроптық заттарды тұрақты негізде сатумен айналысқан. Әр мүшенің қылмыстық топтағы өз рөлі болды. Интернет-дүкен “жылдамдық” деп аталатын психотроптық заттарды сатуды күн сайын жүргізіп, күніне 30-дан 50-ге дейін жасырын қоймаларға заттарды орналастырып отырған. Құқық қорғаушылардың айтуынша, есірткі заттары гипс пен пластилинді пайдаланып, тастың формасында шебер жасырылған.
2024 жылдың 28 қазанында жедел-тергеу іс-шаралары барысында Павлодар қаласының төрт тұрғыны – интернет-дүкен иесі, сату операторы, ораушы және курьер ұсталды. Олардың барлығына қатысты қылмыстық әрекеттері дәлелденіп, айғақ заттар тәркіленді. Тергеу барысында күдіктілерден психотроптық және есірткілік заттар, ұялы телефондар, SIM-карталар, ноутбуктер сияқты заттай дәлелдемелер алынды.
Павлодар облысы ПД ұйымдасқан қылмысқа қарсы күрес басқармасының бастығы Ғабит Қабдрахмановтың мәлімдеуінше, ұсталғандарға қатысты есірткі және психотроптық заттарды өткізу фактісі бойынша сотқа дейінгі тергеу жүргізілуде, күдіктілер қамауға алынды. Полиция департаменті есірткі қылмыстары үшін 10 жылдан 15 жылға дейін бас бостандығынан айыру жазасы қарастырылатынын ескертті.
