Павлодарда ішкі істер органдарының ардагерлері мен жас полицейлер арасында тәжірибе алмасу кездесулері өтті, - деп хабарлайды Polisia.kz.
Павлодар қаласында ішкі істер органдарының ардагерлері учаскелік полиция пункттеріне бекітіліп, жас қызметкерлерге кәсіби бағыт-бағдар беруде. Бұл бастама полиция қызметіндегі сабақтастықты нығайтуға, тәжірибе мен білім алмасуға бағытталған.
Жақында осындай кезекті кездесу Павлодар қаласының оңтүстік бөлімінің №14 учаскелік полиция пунктінде өтті. Оған отставкадағы полковниктер Айдархан Айтбаев, Азат Сейлханов және Айтмұқуш Құрымсинов арнайы келді.
Ардагерлер өздерінің өмір жолы, қызмет барысындағы қиындықтары мен жетістіктері туралы әңгімелеп, мамандықтың қоғамдағы маңызын ерекше атап өтті. Олар жас полицейлерге кәсіби тұрғыда шыңдалу үшін үздіксіз оқып-үйренудің, біліктілікті арттырудың қажеттілігін жеткізді.
Кездесуде учаскелік инспекторлар мен ювеналды полиция қызметкерлері ардагерлердің халықпен қарым-қатынас жасаудағы мол тәжірибесін қызығушылықпен тыңдады. Ардагерлер жанжалды жағдайларды шешу жолдары мен аумақтарда жұмысты тиімді ұйымдастыру туралы құнды кеңестер берді. Сондай-ақ қазіргі заманның сын-қатерлері мен полиция қызметіне енгізіліп жатқан жаңашылдықтар талқыланды.
Жас қызметкерлер ардагерлерге қызмет барысында болған өзгерістер туралы сауалдар қойып, олардың пікірлерін ықыласпен тыңдады. Кездесу соңында ардагерлер жастарға алғысын білдіріп, мұндай кездесулерді тұрақты түрде өткізіп тұрудың маңыздылығын атап өтті.
- Мұндай кездесулер жас буынға кәсіби бағыт-бағдар береді, сонымен қатар полиция мен қоғам арасында ашық және сындарлы диалог орнатуға ықпал етеді. Бұл халықтың полицияға деген сенімін нығайтып, құқық қорғау органдарының қызметі туралы кеңінен ақпараттандыруға мүмкіндік береді, – деп атап өтті Павлодар облысы полиция департаменті.
Бұл игі бастама алдағы уақытта жалғасын тауып, құқық қорғау саласында тәжірибелі мамандардың ақыл-кеңесі жастардың кәсіби деңгейін арттыруға өз үлесін қоспақ.
