Павлодарда курьер-дроппер ұсталды, - деп хабарлайды Polisia.kz.
Киберқылмысқа қарсы күрес қызметкерлері жүргізген жедел-іздестіру іс-шаралары барысында Павлодар қаласының 25 жастағы тұрғыны анықталып, ұсталды. Ол облыс орталығындағы банкоматтардан алаяқтық жолмен ақша ұрлап жүрген.
Тексеру нәтижесінде, ұсталған азаматтың шотына ақша қаражаттары Telegram әлеуметтік желісі арқылы байланысқа шыққан белгісіз тұлғалардан түскені анықталды. Алаяқтар өздерін түрлі банктердің қызметкерлері ретінде таныстырып, жәбірленушілерді несие алуға қызықтырып, олардан қажетті ақпаратты, соның ішінде SMS-кодтарды алып, солардың көмегімен олардың банктік шоттарынан ақша жымқырған.
- Аталған схема бойынша алаяқтар Павлодар облысының тұрғынынан 4 517 999 теңге ұрлап кеткен. Ұсталған адамға қатысты алаяқтық фактісі бойынша сотқа дейінгі тергеу жүргізілуде. Тергеу амалдары жалғасуда, қамауға алу туралы шешім қабылданды, – дейді Павлодар облысының полиция департаменті.
Полиция мәліметі бойынша алаяқтар қарт адамдарға қоңырау шалып, өздерін полиция қызметкерлері ретінде таныстырып, туыстарының апатқа ұшырағанын және оларды жауапкершіліктен босату үшін шұғыл төлем жасау қажет екенін айтып, кейіннен "курьер-дропперлер" арқылы егде жастағы азаматтардан ақша ұрлайды.
Павлодар облысының полиция департаменті азаматтарды, әсіресе қарт адамдарды, осындай алаяқтық қоңырауларға сенбеуге және қырағы болуға шақырады.
Алаяқтардың құрбаны болмас үшін келесі кеңестерді ұстану қажет: сабырлы болыңыздар, жеке ақпаратты ашпаңыздар, күдікті тұлғалармен әңгімені тоқтатыңыздар және дереу туыстарыңызбен байланысыңыз немесе "102" нөміріне хабарласыңыз.
Жеңіл ақша табуды көздейтіндерге, егер сізге әлеуметтік желілер арқылы "курьер" немесе "дроппер" жұмысын ұсынса, және бұл жұмыс заңсыз әрекеттермен, контрабандалық тауарлармен немесе тыйым салынған заттарды таратуға қатысты болса, сіздің заңды жауапкершілікке тартылуыңыз мүмкін екенін есте ұстаңыз. Заңсыз әрекеттерге қатысу қылмыстық жазаға әкеп соғатынын түсіну өте маңызды.
Егер сізге әлеуметтік желілерде осындай ұсыныс түскен жағдайда, оны қабылдамай, заңсыз әрекеттерге қатыспауды ұсынамыз.
