Павлодарда мас такси жүргізушісі 7 жылға көлік басқару құқығынан айырылды, – деп хабарлайды Polisia.kz.
Бірнеше күн бұрын полицияға Павлодар тұрғынынан хабарлама келіп түсті. Арызданушы таксиде отырғанын және жүргізушіден алкогольдің иісі шыққанын айтқан. Сондай-ақ, қыз көлік құралының нөмірі мен маркасын полицейлерге хабарлады.
Н.Назарбаев-Ломов көшелерінің қиылысында көрсетілген барлық мәліметтерге сүйене отырып, полиция қызметкерлері аталған көлікті анықтап, тоқтатты.
– Жүргізушіден алкогольдің иісі шықты. Сондықтан ол медициналық куәландыруды жасауға жіберілді, ол “жеңіл дәрежедегі” мас екенін көрсетті, – деп атап өтті Павлодар қаласы ПБ патрульдік полиция батальонының командирі Ренат Шәріпов.
Ол жүргізушінің бірнеше күн бұрын алкоголь ішкенін және қанда алкоголь әлі де қалғанын айтты.
Павлодарлыққа қатысты ҚР ӘҚБтК 608-бабының 1-бөлімі бойынша әкімшілік хаттама толтырылды. Осыған байланысты сот оны жеті жылға жүргізуші куәлігінен айырды, сондай-ақ 15 тәулікке әкімшілік қамауға алды.
