Павлодарда полицей республикалық чемпионаттың күміс жүлдегері атанды, – деп хабарлайды Polisia.kz.
Павлодар қаласында UWW ережелері бойынша Біріккен күрес әлемінің республикалық чемпионаты өтті. Бұл ауқымды додаға еліміздің әр өңірінен мыңнан астам спортшы, соның ішінде полиция қызметкерлері де қатысты.
Чемпионат тартысқа толы болды. 52 салмақ дәрежесінде өнер көрсеткен спортшылар кілемде шеберліктерін паш етіп, әр жекпе-жек көрермендерге ерекше әсер қалдырды. Финалдық кездесулерде нағыз интрига, жігер мен жеңіске деген ұмтылыс анық байқалды.
77 келіге дейінгі салмақта Павлодар облысының полиция қызметкері Рустам Күзембаев финалға дейін жетіп, күміс медаль иегері атанды. Чемпионатты ұйымдастырушылар Рустамның техникалық мүмкіндіктері мен кәсіби деңгейін жоғары бағалады.
Айта кетерлік жайт, Рустам – грэпплинг пен джиу-джитсудан халықаралық турнирлердің бірнеше мәрте жүлдегері әрі чемпионы.
– Бұл чемпионатта шын мәнінде мықты бәсекелестік байқалды. Мен бала кезден күреспен шұғылданамын, салауатты өмір салтын ұстанамын. Спорт адамның мінезін, рухын және ерік-жігерін шыңдайды деп санаймын. Осындай жарыстарға қатысу өз мүмкіндіктерімді сынауға, спорттық шеберлігімді жетілдіруге септігін тигізеді. Жекпе-жектердің алғашқы минуттарынан-ақ барлық спортшылар батылдық танытып, белсенді өнер көрсетті. Мен де жеңіске жету үшін барымды салдым. Мұнымен тоқтап қалуға болмайды. Алға қарай ұмтылып, биік белестерді бағындыруға тырысамын, – деп ой бөлісті полиция қызметкері.
