Павлодарда полицейлер арасындағы үздік гроссмейстерлер анықталды, – деп хабарлайды Polisia.kz.
Павлодар қаласындағы Шахмат үйінде облыстың тәртіп сақшылары арасында шахматтан іріктеу турнирі өтті. Жарысқа 20 полиция қызметкері қатысып, интеллектуалдық сайыста бақ сынады.
Шахмат алаңында ұзаққа созылған ойындар, әр қадамды мұқият ойластыру, ерекше шешімдер қабылдау және стратегиялық тәсілдер байқауға ерекше серпін берді. Турнир жоғары деңгейде ұйымдастырылып, қызықты да тартысты өтті.
Сайыс қорытындысы бойынша әкімшілік полиция басқармасының аға инспекторы Арман Әбжанов үздік нәтижеге қол жеткізіп, турнир жеңімпазы атанды. Екінші орынды жылдам қимылдайтын арнайы жасақтың инспекторы Серік Серікбаев иеленді. Үшінші орын екі қатысушыға бұйырды. Жылдам қимылдайтын арнайы жасақтың аға инспекторы Қайыржан Смағұлов пен Екібастұз қалалық полиция басқармасының инспекторы Бақтияр Қарамбаев үздік үштікті толықтырды.
– Погон таққан жандардың интеллектуалдық ойындарда да өзін көрсетуі аса маңызды. Соңғы уақытта күш қолданылатын спорт түрлерімен қатар, ой-өрісті дамытуға бағытталған ойындар да танымалдыққа ие болуда. Қызметкерлердің осындай жетістіктерін департамент басшылығы жоғары бағалап, оны өзін-өзі жетілдіруге деген ұмтылыстың көрінісі деп санайды, – деді Павлодар облыстық полиция департаментінің арнайы және жұмылдыру дайындығы басқармасы бастығының орынбасары Владимир Ходацкий.
Алда турнир жеңімпаздарын Алматы қаласында өтетін Қазақстан Республикасы Ішкі істер министрлігі чемпионатында облыстың намысын қорғау міндеті күтіп тұр.
