Павлодарда полицейлер "Асыл Мирас" аутизмі бар балаларды қолдау орталығына барды, - деп хабарлайды Polisia.kz.
Әлемде жыл сайын 2 сәуірде Дүниежүзілік аутизм мәселесі туралы ақпарат тарату күні атап өтіледі. Бұл күн аясында аутизмі бар адамдардың мәселелері туралы айтылып, қоғамның оларды қалай түсініп, өзара әрекеттесу жолдары мен олардың толыққанды азамат ретінде өмір сүруіне кедергі келтіретін проблемалар туралы ақпарат беріледі.
Павлодар қаласы полиция басқармасының орталық полиция бөлімінің қызметкерлері "Асыл Мирас" орталығының басшылығымен ұйымдастырылған іс-шараға қатысып, балаларға қызметтік көліктерін таныстырды. Полицейлер экскурсия өткізіп, балаларға арнайы техниканың ерекшеліктерін түсіндіріп, олардың сұрақтарына жауап берді. Кейбір балалар тіпті патрульдік көлікті жүргізіп, өздерін нағыз полиция қызметкерлері сияқты сезінді. Бұл іс-шара балалар үшін ерекше әсер қалдырып, олардың құқық қорғау органдарының жұмысы туралы түсініктерін тереңдетті.
- Балалар үшін мұндай іс-шаралар өте маңызды, өйткені олар жарқын әсер қалдырып, жағымды эмоциялар сыйлайды. Бұл сәттер ұзақ уақыт есте қалады және олардың қоршаған әлемге деген қызығушылығын арттырады, - деп атап өтті Павлодар қалалық ПБ орталық полиция бөлімінің ювеналды полиция аға инспекторы Гаухар Рахымғожина.
Дүниежүзілік аутизм туралы ақпарат тарату күнінің негізгі мақсаты - қоғамның назарын аутизмі бар адамдардың мәселелеріне аудару, сондай-ақ, балалардың ата-аналарына олардың жалғыз емес екенін сезіндіру. Ең бастысы бұл балаларға әлеуметтенуге, толыққанды өмір салтын ұстануға және өмірде жетістікке жетуге көмектесу болып табылады.
