Павлодарда полицейлер мектептер маңындағы жолдарда қауіпсіздік шараларын күшейтті, - деп хабарлайды Polisia.kz.
Балалардың жол-көлік оқиғаларынан жарақаттануының алдын алу және білім беру ұйымдарына жақын аумақтарда қауіпсіздікті қамтамасыз ету мақсатында Павлодар облысы полиция департаменті қызметкерлері мектептер маңындағы жолдарда бақылауды күшейтті. Қазіргі уақытта патрульдік полиция инспекторлары білім беру ұйымдарының жанында кезекшілік етіп, жол қозғалысы ережелерінің сақталуын қадағалауда.
Полиция мәліметінше, жыл басынан бері облыс аумағында балалардың қатысуымен 25 жол-көлік оқиғасы тіркелген. Соның салдарынан бір кәмелетке толмаған бала қаза тауып, 32 бала түрлі дене жарақатын алған. Бұл көрсеткіштер жол қауіпсіздігін қамтамасыз ету шараларын күшейтудің маңыздылығын айқын көрсетеді.
Инспекторлар жүргізушілерге жаяу жүргіншілер өткелінен өту тәртібін қатаң сақтау қажеттігін ескертіп, жолда жылдамдықты төмендету және балалардың кенеттен пайда болу ықтималдығына әрдайым дайын болу керектігін түсіндіруде. Сонымен қатар ең кішкентай жол қозғалысына қатысушылармен профилактикалық әңгімелер жүргізіліп, олардың қауіпсіз жүріс-тұрыс дағдыларын қалыптастыруға ерекше көңіл бөлінуде.
Полицейлер ата-аналарды да балаларымен жолдағы қауіпсіздік мәселелерін жиі талқылауға шақырады. Атап айтқанда, балаларға жолды тек жасыл бағдаршам белгісі жанғанда және арнайы жаяу жүргіншілер өткелі арқылы кесіп өту керектігін, сондай-ақ жол бойында немесе жүріс бөлігінің жанында ойнауға болмайтынын түсіндіру маңызды.
Сондай-ақ тәртіп сақшылары аула аумақтарында да сақтық шараларын ұстану қажеттігін еске салады. Себебі автокөліктер тұрақ орындарынан немесе гараждардан кенеттен шығып қалуы мүмкін. Егер доп немесе ойыншық жолға шығып кетсе, бала өз бетінше жүгіріп шықпай, міндетті түрде ересектердің көмегіне жүгінуі тиіс.
Қабылданған шаралар жол-көлік оқиғаларының алдын алуға, балалардың өмірі мен денсаулығын сақтауға және мектептер маңындағы жол қауіпсіздігін қамтамасыз етуге бағытталған.
