Павлодарда полицейлер оқушылармен кездесті, - деп хабарлайды Polisia.kz.
Қабанбай батыр атындағы облыстық мамандандырылған әскери мектеп-интернатының оқушыларымен құқық қорғау қызметкерлері тағылымы мол кездесу өткізді.
– Бүгін полиция қызметкерлері бізге өз жұмыстарының ерекшеліктері, ҚР ІІМ Академиясына түсу талаптары мен тәртіптері туралы жан-жақты айтып берді. Мен Қарағанды академиясына оқуға түсуді жоспарлап жүрмін. Бұл кездесуден кейін психологиялық тұрғыда дайын екеніме сенімдімін. Мұндай шаралар бізге жігерлендіріп, патриоттық рухымызды күшейтеді, – деп өз әсерімен Заир Евлоев бөлісті.
Іс-шара барысында оқушылардың сұрақтарына жауап бере отырып, Оңтүстік полиция бөлімі бастығының орынбасары Азамат Елеутаев полиция қызметіне дайындалған әрі мақсатты адамдардың келуінің маңыздылығын атап өтті.
– Уақыт зымырап өтеді. Біраздан соң түлектер мектепті аяқтап, болашақ мамандықтарын таңдауға кіріседі. Біз осы кездесуде жас сарбаздарға полицияның күнделікті өмірі мен қызмет ерекшеліктерін бейнематериалдар арқылы көрсеттік. Сонымен қатар, негізгі бағыттар мен полицейлердің атқаратын міндеттері туралы ақпарат бердік. Бұл кездесу кейбір түлектер үшін шешуші сәтке айналып, олардың болашақ мамандығын таңдауда маңызды рөл атқаруы мүмкін, – деді ол.
Мектеп ұстаздарының пікірінше, полиция мамандығы өмірінде тың серпіліс іздейтін, әр күні жаңа тәжірибе мен ерекше жағдайларға толы жұмысқа қызығатын жастар үшін өте тартымды.
– Бұл мамандық зейінділікті, жылдам әрі дұрыс шешім қабылдауды, ұжымда үйлесімді жұмыс істей білуді, сондай-ақ өзінің және өзгенің қауіпсіздігін қамтамасыз ету қабілетін талап етеді. Полиция қызметі – бұл адамдарға көмектесу мен мемлекетке пайда әкелудің мүмкіндігі, – деп атап өтті полицей.
Кездесу барысында түлектер болашақ полицейлерге қойылатын талаптарға ерекше қызығушылық танытты. Олар заңдар бойынша тестілеуден қалай өтетіні, дене шынықтыруға қатысты нормативтер қандай болатыны жайлы сұрақтар қойып, өздерінің мамандыққа деген қызығушылықтарын білдірді.
Бұл кездесу – жас сарбаздардың жүрегіне сенім ұялатқан, болашаққа бағдар берген маңызды қадамдардың бірі болды.
https://youtube.com/shorts/EsTdRmIFrtU?si=BhguizDuVmwdF1Yb
