Павлодарда полицейлер студенттік жатақханаларда есірткіге қарсы профилактикалық рейд жүргізді, - деп хабарлайды Polisia.kz.
Павлодар облысының есірткі қылмысына қарсы іс-қимыл басқармасы Қазақстан Республикасы ІІМ жанындағы есірткі құқық бұзушылықтарының алдын алу жөніндегі республикалық кеңес мүшелерімен бірлесіп, студенттік жатақханаларда профилактикалық рейд өткізді.
Шараға қызметтік-іздестіру иті Буран есімді кинолог та қатысты.
Профилактикалық іс-шараның мақсаты – жатақханада тұратын, ата-аналарынан алшақ жүрген студент жастар арасында тыйым салынған заттардың таралуына жол бермеу және олардың құқықтық сауаттылығын арттыру. Құқық қорғаушылардың айтуынша, өз бетінше өмір сүріп жатқан жастар түрлі азғыруларға еріп, оңай табыс табуға немесе заңсыз әрекеттерге баруға бейім болуы мүмкін. Сондықтан мұндай кездесулердің негізгі міндеті – есірткі қолданудың қауіптілігін түсіндіру және жастарды есірткі бизнесіне тартылудан қорғау.
Рейд барысында полицейлер оқу орнының әкімшілігі және студенттердің келісімімен Павлодар қаласындағы электроника және коммуникация жоғары колледжінің жатақханасын толық аралап шықты. Тексеру кезінде студенттерге ақпараттық парақшалар таратылып, әкімшілік және қылмыстық заңнама нормалары түсіндірілді. Сондай-ақ жастар өздерін толғандырған сұрақтарын қойып, нақты жауаптар алды.
Есірткі қылмысына қарсы іс-қимыл басқармасының бөлім бастығы Ирина Тимирғалиеваның айтуынша, ведомство Үкімет бекіткен есірткіге және есірткі бизнесіне қарсы күрестің кешенді жоспарын белсенді түрде іске асырып келеді. Бұл стратегиялық құжат тек полицияның ғана емес, өзге де мемлекеттік органдардың бірлескен күш-жігерін қамтиды. Оның негізгі мақсаты – есірткі тәуелділігінің таралуына жол бермеу және елдің генетикалық қорын сақтау.
Іс-шара соңында студенттермен ашық диалог форматында кездесу өткізіліп, заңсыз есірткі айналымына қатысудың салдары мен есірткі заттарының адам ағзасына тигізетін зияны туралы кеңінен айтылды.
