Павлодарда полицейлер жазғы лагерьлерде балаларға қауіпсіздік ережелерін түсіндіруде, - деп хабарлайды Polisia.kz.
Жазғы демалыстың басталуымен бірге Павлодар ауданы аумағындағы "Балдәурен" жазғы сауықтыру лагері өз жұмысын бастады. Бұл демалыс орны – облыстың түкпір-түкпірінен жиналған балалар үшін білім мен тынығуды үйлестіретін ерекше кеңістік.
Лагерьдің ашылуына орай, Павлодар ауданы ювеналды полициясының кәмелетке толмағандар ісі жөніндегі аға инспекторы Лаура Шакарова балалармен және педагогикалық құраммен профилактикалық кездесу өткізді. Ол оқушыларға жазғы демалыстың қызықты әрі қауіпсіз өтуіне тілектестігін білдіріп, мінез-құлықтың негізгі қағидаларын еске салды.
Инспектор балаларға интернет кеңістігіндегі қауіпсіздік туралы кеңес беріп, әлеуметтік желілерде бейтаныс адамдармен сөйлесуден аулақ болуға, жеке ақпаратты жарияламауға және күдікті хабарламаларға жауап бермеуге шақырды. Сонымен қатар ол судағы тәртіп, өрт қауіпсіздігі және қоғамдық орындардағы жауапкершілік туралы да маңызды мәліметтермен бөлісті.
— Жаз — демалыс пен серуеннің маусымы, бірақ бұл кезеңде қауіпсіздікке ерекше мән беру қажет. Әрбір бала өз әрекетінің салдарын ойлап, қауіпті жағдай туындаса, көмек сұраудан қорықпауы тиіс, — деді Лаура Шакарова.
Мұндай кездесулер балалардың құқықтық және қауіпсіздік мәдениетін қалыптастыруға, сондай-ақ олардың жазғы демалысын мазмұнды әрі қауіпсіз етуге бағытталған.
