Павлодарда полиция қызметкерлері бекетте тұрған жүргізушілерге су мен құрма таратты, - деп хабарлайды Polisia.kz.
Қасиетті Рамазан айында игі істер мен өзара көмек ерекше маңызға ие. Екібастұз қаласында полиция қызметкерлері ауызашарға санаулы минуттар қалғанда қайырымдылық акциясын өткізіп, жүргізушілерге су мен құрма таратты.
Тәртіп сақшылары қала көшелерінде автокөлік жүргізушілерін тоқтатып, оларға ауыз ашуға арналған шағын жиынтықтар табыстады. Акция ауызашар уақытын жол үстінде қарсы алып, үйіне үлгермеген азаматтарды қолдау мақсатында ұйымдастырылды.
Бастамаға "Global Wine Ekibastuz" компаниясы серіктес болды. Компания өкілдері қасиетті айда игі іске үлес қосуға қуанышты екендерін атап өтті. Жүргізушілер полицейлерге көрсеткен ықыласы мен қамқорлығы үшін алғыс білдіріп, ораза кезінде жолда жүргендер үшін мұндай қолдаудың маңызы зор екенін жеткізді.
Мұндай іс-шаралар қоғамдағы бірлік пен өзара құрмет атмосферасын нығайтып, Рамазан айының басты құндылықтары — мейірімділік пен жақынға көмек көрсету екенін тағы бір мәрте еске салады.
