Павлодарда қоғамдық орындарда мас күйде болған 4 мыңға жуық тұрғын жауапқа тартылды, – деп хабарлайды Polisia.kz.
Күн жылысымен көшеде алкогольді асыра пайдаланатын адамдар көп болады.
– 2023 жылдың ағымдағы кезеңінде біздің өңірде ішімдік ішкені және көшелерде, басқа да қоғамдық орындарда мас күйде жүргені үшін төрт мыңға жуық павлодарлық жауапқа тартылды, – деді Павлодар қаласы ПБ бастығы Ермек Әлжанов.
Мысалы, 15 маусым күні сағат 14.00-де патрульдеу кезінде полицейлер Гагарин көшесіндегі №68 үйдің жанындағы орындықта ұйықтап жатқан әйелді көрді. Одан алкогольдің өткір иісі шықты. Оянған кезде, аяғын әрең ұстайтын күйде болды.
Сол күні кешке, Целиная көшесінде №91 үйдің жанындағы полицейлер тағы да мас адамды байқады. Лас, киімі жыртылған, өзін дұрыс ұстамай, өз әрекеттерін басқара алмай, айналасындағыларды қорлап, адамдарға және өзіне ықтимал қауіп төндіретін күйде болды. Полицейлер ұсталған азаматтарды уақытша бейімдеу және детоксикация орталығына жеткізді. Онда медициналық куәландыру алкогольдік масаңдықты растады. ҚР ӘҚБтК-нің 440-бабы бойынша азаматтар әкімшілік жауапкершілікке тартылды.
– Құқық бұзушылықтар мен жазатайым оқиғалардың едәуір бөлігі алкогольдің әсерінен болады. Егер сіз қоғамдық жерде біреудің ішімдік ішіп жатқанын немесе тәртіпті бұзғанын көрсеңіз – бұл полиция немесе жедел жәрдем шақыруға себеп болады, – деді Әлжанов.
