Павлодарда құқық бұзушылықтардың алдын алу бойынша рейд жүріп жатыр, – деп хабарлайды Polisia.kz.
Павлодар қаласында құқық бұзушылықтардың алдын алу шеңберінде полиция қызметкерлері рейдтік іс-шараларды жалғастыруда. Іс-шаралардың негізгі мақсаты – қоғамдық қауіпсіздікті қамтамасыз ету, құқыққа қайшы әрекеттердің алдын алу және азаматтардың құқықтық санасын арттыру.
Тәртіп сақшылары қала көшелерінде, тұрғын үй аулаларында, ойын-сауық орындарында және басқа да қоғамдық орындарда патрульдік қызмет атқаруда. Тұрмыстық құқық бұзушылықтардың, кәмелетке толмағандар арасындағы құқық бұзушылықтардың алдын алуға, сондай-ақ әкімшілік құқық бұзушылықтарды анықтауға назар аударылып жатыр.
Рейд барысында азаматтармен профилактикалық әңгімелер жүргізіліп, заң талаптары түсіндіріліп, қоғамдық орындарда жүріп-тұру ережелері еске салынуда. Сонымен қатар профилактикалық есепте тұрған тұлғалар, қоғамдық тәртіп бұзушылар және бұрын сотталған азаматтар тексерілуде.
Құқық бұзушылықтардың алдын алу айлығы қаладағы криминогендік жағдайды жақсартуға және тұрғындар арасында заңды сақтау мәдениетін қалыптастыруға бағытталған.
Полиция азаматтарды заң талаптарын сақтауға және өңірдегі қауіпсіздікті қамтамасыз ету мақсатында құқық қорғау органдарымен бірге ынтымақтасуға шақырады.
