Павлодар облысы бойынша ҚАЖД-ға қарасты №46 мекемесінде экологиялық ахуалды жақсартуға және тұрмыстық қалдықтарды кәдеге жаратуға бағытталған ерекше жоба қолға алынды, - деп хабарлайды Polisia.kz.
Сотталған азаматтар пластик қалдықтарын қайта өңдеу ісін игеріп, осы бағытта пайдалы дағдыларды меңгеруді бастап кетті.
Жобаның басты жаңалығы – мекеме аумағында арнайы үлкен контейнер-кәрзеңкелердің орнатылуы. Олар пайдаланылған пластик бөтелкелерді жинауға арналған. Жиналған қалдықтар қайта өңделіп, брусчатка (тротуарлық плиткалар) жасау үшін пайдаланылатын болады. Бұл экологиялық шешім қоршаған ортаға келетін зиянды азайтып қана қоймай, сотталғандарға кәсіби машықтарды меңгеруге мүмкіндік береді.
- Жобаның басты мақсаты – тек қана экологияны қорғау емес, сонымен қатар сотталғандарды пайдалы істерге тартып, олардың қоғамға пайда әкелетін дағдыларды игеруіне ықпал ету. Бұл – тұрақты даму жолындағы маңызды қадам, – деп атап өтті мекеме бастығының орынбасары Нұрлан Баякенов.
Мекеме басшылығы бұл жобаның ұзақ мерзімді перспективада тек қалдықтарды кәдеге жаратып қана қоймай, сотталғандардың тұрмыстық жағдайын жақсартуға да үлес қосатынына сенімді.
