Павлодарда жаңа жылдық мерекелердің қауіпсіз өтуіне бағытталған акция басталды, - деп хабарлайды Polisia.kz.
Павлодар облысының ювеналдық полиция қызметкерлері жаңа жылдық мерекелер қарсаңында "Жаңа жылдық мерекелер жағымсыз оқиғасыз өтсін!" акциясы аясында білім беру ұйымдарында ұйымдастырылған шыршаларда кезекшілік атқаруда. Іс-шара барысында оқушыларға қысқы демалыс пен мерекелік кезеңдегі қауіпсіздік ережелері кеңінен түсіндірілуде.
Құқық қорғау органдарының қызметкерлері балалармен жүргізілген әңгімелер барысында демалыс уақытында қауіпсіз мінез-құлықтың маңыздылығына ерекше назар аударады. Сонымен қатар мерекелік іс-шаралар кезінде ата-аналармен де түсіндіру жұмыстары жүргізіліп, олардың балалардың жүріс-тұрысы мен қауіпсіздігі үшін жауапкершілігі ескертіледі.
Профилактикалық әңгімелер аясында балаларға көшеде, үйде және қоғамдық орындарда қауіпсіздік талаптарын сақтау, заңды құрметтеу және айналасындағыларға сыйластықпен қарау қажеттігі қолжетімді әрі түсінікті тілмен жеткізіледі.
Мұндай форматтағы кездесулер балалар мен полиция қызметкерлері арасындағы өзара сенімді нығайтып, оқушылардың құқық қорғау органдарына деген оң көзқарасын қалыптастыруға ықпал етеді.
Ведомство өкілдерінің айтуынша, инспекторлардың мерекелік іс-шараларға қатысуы игі дәстүрге айналған. Бұл өз кезегінде жаңа жылдық мерекелердің тек көңілді ғана емес, сонымен қатар қауіпсіз өтуіне мүмкіндік береді.
