Павлодарда жастарға арналған "Moot Court" форматындағы сот процесі ұйымдастырылды, - деп хабарлайды Polisia.kz.
Павлодар облысында құқықтық мәдениетті арттыруға бағытталған "Moot Court" үлгісіндегі сот процесі өтті. Шараға қала мектептерінің жоғары сынып оқушылары мен студенттер қатысты. Олар тергеуші, прокурор, судья және айыпталушының рөлдерін сомдап, сот талқылауына толыққанды қатысу мүмкіндігіне ие болды.
Іс-шара есірткі қылмыстары тақырыбына арналды. Шартты сот залында процестің шынайы форматы көрсетіліп, айыптау тарапының ұстанымы жарияланды, қорғау жағы өз дәлелдерін ұсынды, куәлар тыңдалып, айғақтар зерттелді. Сценарий негізінде жас азаматтың жеңіл табыс уәдесіне алданып, есірткі таратуға тартылуы және тыйым салынған заттарды сақтау мен өткізудің құқықтық салдары қарастырылды.
Қатысушылар тез пайда табу иллюзиясының артында қылмыстық жауапкершілік, соттылық және өмірлік мүмкіндіктердің шектелуі тұрғанын тәжірибе жүзінде ұғынды. Пікірталас барысында жастар заңнама нормаларын талдап, өз ұстанымдарын негіздеп, дербес қорытындылар жасады.
Павлодар облысы полиция департаментінің мәліметінше, іс-шараға облыстық прокуратураның, полиция органдарының және адвокатураның тәжірибелі өкілдері сарапшы ретінде қатысып, қатысушылардың жұмысына кәсіби баға берді.
