Ұлттық ұлан академиясында өтіп жатқан республикалық оқу-әдістемелік жиындарға қатысушылар Петропавл қаласы полиция басқармасының ғимаратында орнатылған полиция капитаны Ғазиз Байтасовты еске алуға арналған мемориалдық тақтаға гүл шоқтарын қойды, – деп хабарлайды Polisia.kz.
Қалалық полиция ведомствосының алаңында Қазақстанның түкпір-түкпірінен келген 100-ден астам полиция офицері сап түзеді. Олардың әрқайсысы кадр саясаты жөніндегі бөлімше бастығының орынбасарлары. Олар сеніп тапсырылған жеке құрамды тәртіпке, мәдениетке және оқыту бағыттары бойынша жауап береді.
Жиынға Солтүстік Қазақстан облысы полиция департаменті бастығының орынбасары Сәуле Андағұлова қатысты. Ол полиция капитаны Ғазиз Байтасовтың ерлігі қазақстандықтардың ұрпақтарының жадында мәңгі қалатынын атап өтті. Сондай-ақ Тараз қаласы полиция басқармасы бастығының орынбасары Семей Сексенбаев сөз сөйледі.
Офицерлер әскери сәлемдесіп, қалампыр гүлдерін қойды. Іс-шара салтанатты шерумен аяқталды.
2011 жылғы 12 қарашада Тараз қаласында қарулы қылмыскерді құрықтау кезінде 7 адам қаза тапты, оның ішінде 3 полиция қызметкері мен ҰҚК-нің 2 қызметкері. Қылмыскердің өзін-өзі жару кезінде жеке жол полициясы батальонының взвод командирі полиция капитаны Ғазиз Байтасов ерлікпен қаза тапты, ол гранатаны денесімен жауып тастады. Батырдың суреті бар ескерткіш тақта 2,5 ай бұрын, оның қайтыс болған күні қарсаңында Петропавл қаласының полиция басқармасының ғимаратында салтанатты түрде ашылды.
ІІМ идеологиялық және имидждік жұмыс департаментінің ғылыми қызметкері Болат Қаженовтың айтуынша, ҰҰА базасында өтіп жатқан оқу-әдістемелік жиындарға тренингтер, семинарлар, саптық дайындық кіреді. Бұған дейін осындай курстар 16-21 қаңтар аралығында өтті; олардың қорытындысы бойынша еліміздің барлық облыстарынан 100-ден астам полиция қызметкері сертификат алды.
