Қызылордада ҚАЖ қызметкері адасып қалған бүлдіршінді байқап, әжесіне аман-есен табыстады, – деп хабарлайды Polisia.kz.
Қызылорда қаласында қылмыстық-атқару жүйесінің қызметкері Нұргүл Алыбаева көшеде жылап тұрған кішкентай баланы байқап, оның адасып қалғанын бірден түсінді. 5 жасар бүлдіршін әжесін дәріхананың алдында күтіп тұрған еді. Алайда ойынға беріліп, байқамай сыртқа шығып кетіп, әжесінен көз жазып қалған.
Жағдайды жылдам саралаған Нұргүл балаға жылы сөздер айтып, сабырға шақырды. Ол бүлдіршіннің аты-жөнін, әжесінің кім екенін анықтап, бірден 102 нөміріне хабарласты.
Ал бұл кезде немересінен көз жазып қалған әжесі жанұшыра оны іздеп, алаңдап жүр еді. Кенет көшеде ҚАЖ қызметкерінің қолынан аман-есен немересін көргенде, көңілі орнына түсіп, көзіне жас алды.
— Бір сәтте немеремді таппай қалдым. Көзді ашып-жұмғанша... Қанша іздесем де, таба алмадым, қатты қорықтым. Ал Нұргүл қызым оны аман-есен тауып, жанынан бір сәтке де алыстамаған. Осындай қамқор жандарға алғысым шексіз. Қызметтеріңізге сәттілік тілеймін, — деп балақайдың әжесі ризашылығын білдірді.
Бұл оқиға қылмыстық-атқару жүйесі қызметкерлерінің тек құқық қорғау саласында ғана емес, қоғамдағы бейбітшілік пен қауіпсіздікті қамтамасыз етуде де маңызды рөл атқаратынын тағы бір мәрте дәлелдеді. Жауапкершілік пен мейірімділік – әр азаматқа үлгі болар қасиет.
