Алматы облыстық полиция департаментінде Қазақстан Республикасы Ішкі істер министрлігі әзірлеген тұрмыстық қатынастар саласындағы құқық бұзушылық қаупін бағалау стандартын енгізу бойынша ведомствоаралық жұмыс тобын құруға арналған дөңгелек үстел өтті, – деп хабарлайды Polisia.kz.
Шараға мемлекеттік органдардың, құқық қорғау органдарының және үкіметтік емес ұйымдардың өкілдері қатысты. Кездесудің құрметті қонағы Қазақстан Республикасындағы Бала құқықтары жөніндегі уәкіл Динара Зәкиева болды, ол отбасылық зорлық-зомбылықтың алдын алудың маңыздылығына және ең осал топтар – балаларды қорғау қажеттілігіне тоқталды.
– Кез келген тұрмыстық зорлық-зомбылық – бұл жеке мәселе емес, қоғамдық қауіпсіздік пен балаларымыздың болашағына тікелей қатысты. Біз күш-жігерімізді біріктіріп, қайғылы жағдайлардың салдарын жою емес, олардың алдын алуға басымдық беруіміз керек. ІІМ әзірлеген жаңа стандарт – қауіптердің алдын алып, оларды ерте анықтауға және уақтылы шара қабылдауға бағытталған маңызды қадам, – деп атап өтті Д. Зәкиева.
Кездесуде басты назар стандартты іс жүзінде енгізуге, сондай-ақ барлық мүдделі ведомствоның өзара әрекеттесу алгоритмін нақтылау мәселелеріне баса назар аударылды. Мұның негізгі мақсаты – ауыр зардаптардың алдын алу және қайталанатын құқық бұзушылықтарға жол бермеу.
ІІМ әзірлеген стандарт агрессияға бейім адамдарды ерте анықтауға және алдын алу шараларын қабылдауға бағытталған. Оның енгізілуі формалды әрекет етуден бас тартып, зорлық-зомбылықтың алдын алу жүйесін қалыптастыруға мүмкіндік береді.
– Әр бөлім бірыңғай тәсіл аясында өз қызметінің алгоритмін ұсынды. Қатысушылар жедел әрекет ету және жәбірленушілерді тиімді қорғау үшін тығыз үйлестіру мен уақтылы ақпарат алмасудың маңыздылығын атап өтті. Сонымен қатар агрессорларды қайта әлеуметтендіру, халықтың құқықтық сауаттылығын арттыру және алдын алу жұмыстарын күшейту шаралары талқыланды. Облыстық, қалалық және аудандық деңгейлерде тұрақты ведомствоаралық жұмыс топтарын құру ұсынылды, – деп атап өтті ұйымдастырушылар.
Қатысушылардың ортақ пікірі – отбасылық-тұрмыстық зорлық-зомбылық деңгейін төмендету және қоғамда агрессияға төзбеушілік мәдениетін қалыптастыру үшін кешенді тәсіл мен барлық мүдделі тараптардың үйлесімді әрекеті қажет.
