Қостанай облысында полиция рұқсат етілмеген қоқыс үйінділерімен күресу үшін «фото тұзақтар» орнатуды ұсынды, – деп хабарлайды Polisia.kz.
Рұқсат етілмеген қоқыс үйінділерімен күрестегі өзара іс-қимыл мәселелерін полицейлер, экологтар және жергілікті билік өкілдері дөңгелек үстелде талқылады. Кездесуге қатысушылар өңірдегі осындай қоқыс үйінділерін анықтауға және жоюға бағытталған жаңа шараларды қарастырды.
Қазіргі уақытта өңірде ірі қоқыс үйінділерін анықтаумен және жоюмен айналысатын полиция, экологтар мен әкімдік қызметкерлерін қамтитын 38 мобильді топ жұмыс істейді.
Осы жұмыс аясында жергілікті полиция қызметі басқармасының бастығы Мақсұт Ералиев рұқсат етілмеген қоқыс үйінділерінің орналасқан жерінде портативті «фото тұзақтарды» орнатуды ұсынды. Мұндай құрылғылар мобильді болады, бұл заң бұзушылықтарды тез тіркеуге және кінәлілерді жауапқа тартуға мүмкіндік береді.
Сондай-ақ Мақсұт Ералиев 2024 жылы өңірде қоқыс үйінділерінің 43 фактісі тіркелгенін, оның 20-сы жойылғанын хабарлады. Қоқыс үйінділері Қостанай, Амангелді ауданы, Жітіқара, Қамысты, Науырзым, Ұзынкөл және Федоров ауданы сондай-ақ, Рудный қаласын қоса алғанда, әртүрлі елді мекендерде анықталды.
Жалпы, өңірде қоқыс үйінділері үшін 9 мыңға жуық адам және қоғамдық орындарды ластағаны үшін 3 мыңға жуық адам әкімшілік жауапкершілікке тартылды. Салынған айыппұлдар сомасы 44 миллион теңгеден асты.
Іс-шара «Таза Қазақстан» экологиялық акциясы аясында өтті.
