Бүгін 6505 әскери бөлімінің саптық алаңында Қарағанды облыстық полиция департаменті қызметкерлерінің арасында саптық ән байқауы өтті, – деп хабарлайды Polisia.kz.
Аталған шараға жылдам қимылдайтын арнайы жасақ, облыстық полиция департаментінің патрульдік полиция батальоны, Қарағанды және Теміртау қалалық полиция басқармасының қызметкерлері қатысты.
– Полицияның негізгі міндеттерінің бірі – қоғамдық қауіпсіздікті сақтау болса, бүгін біз сол жолда алдыңғы сапта жүрген тәртіп сақшыларын тағы бір қырынан танығалы отырмыз. Саптық жинақылық пен саптық бой түзеп, салтанатты шерумен жүріп өту, жас сарбазбен нысанды киім киген полицияның бұлжымас қағидасы болуы тиіс. Сондықтан да бүгін біз облыстық полиция департаментінің саптық бөліністері қызметкерлерінің саптық ән байқауын өткізіп отырмыз. Бұл ретте, тәртіп сақшылары тек ана тілімізде ғана емес, 5 тілде өз өнерлерін көрсететін болады, – деді облыстық полиция департаментінің бастығы Санжар Әділов.
Департамент бастығының құттықтау сөзінен кейін сап түзеген тәртіп сақшылары алдын ала берілген тапсырма бойынша 5 тілде ән айтып, өз өнерлерін ортаға салды. Саптық алаңда тәртіп сақшылары Ататүріктің ұранына айналған «Измир маршын», итальян тіліндегі «Белла чао» (Прощай красавица), ана тілімізде «Мен қазақпын», орыс тілінде «Через две зимы» сонымен қатар ағылшын тіліндегі «In the army now» (Теперь ты в армии) әндерін орындады. Алғаш рет саптық бөлініс қызметкерлері арасында өткен ән байқауы өте жоғары деңгейде өтті.
Байқауға қатысушылардың тыңғылықты дайындалғаны оны тамашалауға келген көрермендердің де көңілінен шықты. Сайыс қорытындысы бойынша бірінші орынды «Измир маршын» орындаған жылдам қимылдайтын арнайы жасақ қызметкерлері жеңіп алса, екінші орынды «Через две зимы» әнін нақышына келтіріп айтқан облыстық полиция департаментінің патрульдік полиция батальоны, ал үшінші орынды «Мен қазақпын» әнін орындаған қалалық полиция басқармасы патрульдік полиция полкінің қызметкерлері місе тұтты.
– Біз бұл байқауға өте тыңғылықты дайындалдық. Жұмыстан бос уақытымызда әріптестерімізбен әннің сөзін жаттап, күнделікті қызметке түсу алдындағы саптық таратылымда орындадық. Нәтижесі жаман болған жоқ. Екінші орынға ие болдық,- деді облыстық полиция департаменті патурльдік полиция батальонының қызмет инспекторы Ержас Хасенов.
Марапаттау салтанатынан кейін байқаға қатысушылар салтанатты шеру жасап, қызмет атқаруға кірісті.
