"Заң мен тәртіп" қағидатын басшылыққа ала отырып, Қарағанды облысында полиция өңірде есірткіге қатысты құқық бұзушылықтардың алдын алу және жолын кесу бағытында кешенді шараларды жүйелі түрде жүргізіп келеді, – деп хабарлайды Polisia.kz.
Жыл басынан бері заңсыз айналымнан 1 тоннадан астам есірткі заты тәркіленіп, жеті есірткі зертханасы жойылды.
— Бүгінде басты қауіп – синтетикалық есірткілер. Дегенмен, полицияның жүйелі әрі нәтижелі жұмыстарының арқасында олардың тәркілену көлемі 590 келіге дейін артты. Тәркіленген заттардың басым бөлігі — мефедрон мен альфа-PVP секілді синтетикалық есірткілер.
Ақшалай баламада заңсыз айналымға түспеген есірткілердің жалпы құны 14 млрд 750 млн теңгені құрайды, — деді Қарағанды облысы полиция департаменті бастығының бірінші орынбасары Әбіл Әбілдин.
Полицейлердің жедел-іздестіру шаралары барысында есірткі саудасына қатысы бар 45 адам ұсталды, олардың ішінде 32-сі — таратушылар, 13-і — ұйымдастырушылар.
Тергеу кезінде өңіраралық байланысы бар ұйымдасқан қылмыстық топтардың қызметі әшкереленіп, олардың 560 млн теңгеден астам заңсыз табысты заңдастырғаны анықталды.
Сонымен қатар облыс аумағында есірткіні жарнамалайтын 7 мыңнан астам граффити жойылып, 3 жарнама таратушы ұсталды.
Полиция алдағы уақытта да есірткі қылмысына қарсы күресті күшейтіп, синтетикалық заттардың таралу арналарына тосқауыл қою және жастар үшін қауіпсіз орта қалыптастыру бағытындағы жұмыстарды жалғастыратын болады.
