Қарағанды облысында көші-қон заңнамасын бұзудың 200-ден астам дерегі анықталды, - деп хабарлайды Polisia.kz.
Қарағанды облысында көші-қон саласындағы құқық бұзушылықтардың алдын алу және олардың жолын кесу мақсатында "Заңсыз келуші" жедел-профилактикалық іс-шарасы өткізілуде. Барлығы екі күн ішінде жүргізілген тексеріс нәтижесінде 222 көші-қон заңнамасын бұзу дерегі тіркелді.
Тексеру шаралары құрылыс нысандарын, өнеркәсіптік кәсіпорындарды және шаруа қожалықтарын қамтыды. Нәтижесінде шетел азаматтарын тиісті рұқсатсыз жұмысқа тарту және олардың еңбек қызметін заңсыз жүзеге асыру фактілері анықталды.
Мәселен, Қарағанды қаласында көрші елдердің 20 азаматы шаруа қожалығында және өндірістік зауытта тиісті рұқсатсыз еңбек еткені үшін ұсталды. Сондай-ақ полиция қызметкерлері сот шешімімен елден шығарылғанына қарамастан Қазақстан аумағында заңсыз қалған 10 шетелдікті анықтады.
Операция қорытындысы бойынша бұрын елден шығарылған 20 тұлға мәжбүрлеп өз отандарына жөнелтілді. Бұдан бөлек, жұмыс берушілер мен қабылдаушы тараптардың 50-ден астам құқық бұзушылық дерегі тіркелді. Бұл жағдай көші-қон заңнамасын сақтау саласында бақылауды күшейту және жауапкершілікті арттыру қажеттігін айғақтайды.
Қарағанды облысының полиция департаменті атап өткендей, көші-қон заңнамасын бұзушылықтардың алдын алу және анықтау жұмыстары жүйелі түрде, күнделікті негізде жүргізіліп келеді.
