Қарағанды облысында мал ұрлығының алдын алу үшін полицейлер блок-бекеттер мен дрондарды қолдануда, – деп хабарлайды Polisia.kz.
Қыркүйек айынан бастап Қарағанды облысының полиция қызметкерлері мал ұрлығының жолын кесу мақсатында арнайы блок-бекеттер орнатып, тасымалданып жатқан ет өнімдерінің құжаттарын мұқият тексеруде. Суық маусымда ет дайындаушылар ауыл тұрғындарынан малдың тушаларын ірі көлемде сатып алады. Алайда көптеген мал иелері тасымалдау үшін қажетті анықтамаларды ұсынбайды. Бұл — мал ұрлығының алдын алу бағытындағы маңызды шаралардың бірі.
Сонымен қатар мал ұрлығының алдын алу үшін полицейлер дрондарды пайдаланып, жайылымдарды жүйелі түрде бақылаудан өткізеді. Жүргізілген жұмыстардың нәтижесінде жыл басынан бері 19 мал ұрлығы фактісі әшкереленді. Малдың ауылдағы сатушыдан базардағы сатып алушыға дейінгі қозғалыс тізбегін анықтау барысында тұрақты түрде барымтаға қатысы бар 4 қылмыстық топ құрықталды. Барлық жиналған дәлелдемелер сотқа жолданды.
Мысал ретінде, Қарқаралы ауданында бір фермердің 27 бас жылқысы қолды болған жағдайды атап өтуге болады. Күдікті қылмыстық қудалау органдарынан бой тасалап жүрген, алайда қазіргі уақытта ұсталып, сотқа жеткізілді.
Жасалған талдау көрсеткендей, мал ұрлығының 70 пайызы малдың қараусыз, емін-еркін жайылуынан орын алады. Кейбір мал иелері өз мүлкін бірнеше ай бойы тексермей жатады. Дәл осындай жағдайдың бірі 54 жастағы ауыл тұрғыны екі айдан кейін ғана малын қарап, 29 басының жоғалғанын анықтаған. Шығын көлемі 20 млн теңгеден асып түсті.
Полиция азаматтарды малдарына барынша жауапкершілікпен қарауға, таңбалап, GPS-чип орнатуға, сондай-ақ тек сенімді бақташыларды жалдауға шақырады.
