Қарағандыда екі адамды өлтірген күдіктілер ұсталды, – деп хабарлайды Polisia.kz.
4 қараша күні сағат 11.30 шамасында Қарағандыда жеке тұрғын үйдің ауласынан пышақ жарақаттарымен екі ер адамның мәйіті табылды. Полицейлер қайтыс болған адамның бірі үйдің 59 жастағы иесі, екіншісі – осы ғимаратта жөндеу жұмыстарын жүргізген құрылыс бригадасының 72 жастағы бригадирі екенін анықтады. Куәгерлердің айтуынша, екі жұмысшы жәбірленушілерді пышақтап, көлікті иемденіп, қашып кеткен.
– Дабыл қағылып, күдіктілерді ұстау жоспары жарияланды. Күдіктілер мінген көлік бірден облыстық Полиция департаментінің бейнебақылау камераларына түсіп қалған. Жедел кезекші олардың қозғалысын қадағалап, барлық ақпаратты патрульдік полиция қызметкерлеріне жеткізіп отырды. Сауатты түрде жүргізілген жедел-іздестіру іс-шараларының нәтижесінде Теміртау қаласының ПБ патрульдік полиция батальонының қызметкерлері Қарағанды-Теміртау тас жолында ұрланған көлікті байқады. Полицейлер екі күдікті – 34 және 39 жастағы ер адамдар мінген көлікті ұстады. Ұсталғандар қылмысын мойындап, қылмыс құралы тәркіленді, – деп хабарлады Қарағанды облысының ПД басшысы Ерлан Файзуллин.
ҚР ҚК-нің 99-бабының 2-бөлігімен қылмыстық іс қозғалды. Тергеу шаралары жүргізілуде. Қазіргі уақытта полицейлер оқиғаның себептері мен мән-жайын анықтауда.
