Қарағандыда есірткі саудасын жарнамалайтын парақшаларды жапсырумен айналысқан жасөспірімдер ұсталды, – деп хабарлайды Polisia.kz.
Қарағанды қаласында Октябрь полиция бөлімінің учаскелік инспекторлары әкімшілік аумақты аралау кезінде тұрғын үйлердің бірінің есігіне жаңадан жапсырылған QR-коды бар парақшаны анықтады. Тексеру нәтижесінде сілтеменің есірткі саудасына қатысты Telegram-арнасына апаратыны белгілі болды.
Жедел әрекет ету нәтижесінде полицейлер 14 және 15 жастағы кәмелетке толмаған екі қызды ұстады. Ұсталғандардың қолында әлі жапсырылмаған 60-қа жуық парақша тәркіленді.
Қыздардың айтуынша, олар бұл жұмысты хабарландыру арқылы тапқан. Әрбір жапсырылған парақша үшін оларға 70 теңге төленген. Мектепте бұған дейін мұндай іс-әрекеттер үшін қылмыстық жауапкершілік көзделетіні бойынша бірнеше рет ескерту жасалғанына қарамастан, қыздар бұл жарнаманың зиянсыз екеніне сендірілгенін айтты. Олар сілтеменің халық тұтынатын тауарлар сататын интернет-дүкенге апаратынын көрсеткен.
Қазіргі уақытта қозғалған қылмыстық іс аясында заңсыз материалдарды таратуды ұйымдастырған адамдарды анықтау бойынша тергеу амалдары жүргізілуде.
Есірткі жарнамасымен күресу мәселесі өзекті болып қала береді. 2024 жылы Қарағанды облысының полицейлері еріктілермен және облыстық прокуратура қызметкерлерімен бірлесіп, есірткі жарнамасын жоюға бағытталған 500-ден астам іс-шара өткізді. Нәтижесінде 13 мыңға жуық сурет жойылып, заңсыз табыс көздерін ұсынған 271 әлеуметтік желі аккаунты бұғатталды.
2025 жылдың басынан бері бұл жұмыс белсенді түрде жалғасуда. Қаңтардың алғашқы екі аптасында 11 іс-шара өткізіліп, 36 жаңа граффити жойылды және есірткі таратуға қатысты 21 мекенжай жабылды.
Қарағанды облысының полициясы есірткі қылмысымен күресуде азаматтар мен еріктілердің бірлескен жұмысының маңыздылығын ерекше атап өтеді. Мұндай шаралар тек қауіпсіз қалалық орта құруға ғана емес, сонымен қатар қоғамда есірткіге қарсы белсенді ұстаным қалыптастыруға ықпал етеді.
